Bókarkápa í SuperPaint
Þegar ég eignaðist mína fyrstu tölvu, Macintosh Plus, í árslok 1986 varð ég fljótlega fyrir léttum vonbrigðum með útkomu teikninga út úr þeim forritum sem boðið var upp á. Það var reyndar bara hægt að velja um MacPaint og MacDraw á þeim tíma. Fljótlega eignaðist ég þó SuperPaint og þótti mikil framför. Samt sem áður vantaði algerlega þessar mjúku sveigðu línur sem maður gat gert seinna í vectorforritum.
Fyrst í stað átti ég ekki laser prentara og ef maður vildi fá eitthvað annað en útprent úr ImageWriter nálaprentara þurfti maður að fara út í Reiknistofu Háskólans til þess að prenta út. Þessar hömlur reyndi maður að yfirstíga af fremsta megni og ég gerði tilraunir með SuperPaint, prenta út úr forritinu og vinna svo með áfram í þeim tækjum sem maður notaði í þá daga. Ég komst fljótlega að því að að best væri bara að láta pixelin njóta sín í því sem maður var að gera.
Eitt af þeim verkefnum sem ég nýtti SuperPaint í var bókarkápa sem ég gerði fyrir Mál og menningu. Flyskræk, kennslubók í dönsku. Myndin, sem er hér að hluta, er teiknuð með klunnalegu músinni sem fylgdi tölvunni. Þegar ég var búinn að teikna myndina fór ég út í Reiknistofnun og prentaði út. Repromyndavélin var notuð til þess að koma teikningunni yfir á glæru og aftan á glæruna málaði ég myndina með þekjulitum. Einnig kóperaði ég snifsi úr dönsku dagblaði og setti inn í pappírsskutluna. Eftirvinnslan fór svo fram í prentsmiðju. Það hefði verið munur að hafa Photoshop til þess að gera allt þetta en eftir lifir að ég held alltaf svolítið upp á þessa teikningu og pixelin í henni.
